* * *
Сөйлә миңа серләреңне, Идел-елга,
Ишеттер син җыр-авазын үткәннәрнең.
Һәм ышанып тапшыр изге әманәтен
Мең ел элек монда гомер иткәннәрнең.
Көйлә моңлы көйләреңне, Идел-елга,
Янсын йөрәк, сызласын җан, күңел тулсын,
Гамьсезләрнең юлы сине урап узсын,
Гүзәл моңнар миңа гомер юлдаш булсын.
Мин җырлармын сөеп синең горур җырны,
Отып калыр аны миннән балаларым.
Һәм буыннан буыннарга күчәр шулай
Бу меңнән бер әманәте бабамнарның.
