ӘТИ
Типсә тимер өзәр егет
Син идеңме? Синдер, әти.
Мәйданнарда көрәш тоткан
Син идеңме?.. Синдер, әти.
Мәҗлесләрдә җыр башлаучы
Син идеңме?.. Синдер, әти.
Авылның бер таянычы
Син идеңме? Синдер, әти.
Кинодагы кыю солдат
Син идеңме? Синдер, әти.
Байрак тотып утка кергән
Син идеңме?..
Синдер, әти...
Курганнарда җилләр исә...
Җылы җилләр синдер, әти.
Мәңгелек ут яна дөрләп,
Синме ул ут?.. Синдер, әти...
